Fyrir rúmu ári síðan gerðu aðgerðasinnar víðs vegar að úr heiminum tilraun til að brjóta á bak aftur það siglingabann sem Ísraelsríki hefur haldið uppi við strendur Gaza síðustu ár. Aðgerðin, sem var kölluð Gaza Freedom Flotilla (Frelsisskipalest til Gaza), fólst í því að sigla skipalest af nauðþurftum og vistum sem íbúa Gaza skortir sárlega, ásamt skipum fullum af farþegum sem vildu sýna samstöðu með palestínsku þjóðinni í verki. Hún hlaut snöggan endi þegar ísraelskir sérsveitarmenn réðust um borð í skipin sex á meðan þau voru enn á alþjóðlegu hafsvæði og drápu níu manns í einu þeirra, allt tyrkneska borgara. Í kjölfarið voru skipin dregin í ísraelska höfn, farþegar handteknir og reknir úr landi. Í þessum skrifuðum orðum, er þó önnur tíu skipa lest við höfn í Grikklandi, reiðubúin að sigla af stað til Gaza í sams konar aðgerð.

Áróðursvélin keyrð í gang
Gaza Freedom Flotilla II hefur ekki farið klakklaust af stað, en ísraelsk stjórnvöld hafa verið dugleg að virkja ríkisstjórnir í Grikklandi, Kanada, Spáni og í Bandaríkjunum til að gera væntanlegum farþegum og áhafnarmeðlimum lífið leitt með hótunum, kvörtunum og ásökunum um að tengsl séu á milli skiplestarverkefnisins og styrkja til Hamas-samtakanna, sem einhverjar ríkisstjórnir á borð við þær kanadísku og bandarísku hafa skilgreint sem hryðjuverkasamtök. Reyndar var það sama uppi á teningnum í fyrra þegar Ísrael reyndi af mesta megni að sannfæra heiminn um að skipalestin ætlaði sér að flytja hergögn til Hamas undir því yfirskyni að um lyf og nauðsynjar væri að ræða. Þau „vopn” sem ísraelski herinn sagðist svo hafa fundið um borð á tyrkneska skipinu Mavi Marmaris voru mestmegnis verkfæri og eldhúshnífar ásamt viðarbareflum og einni teygjubyssu. Tvennum sögum fer af því sem átti sér stað við innrás hersins á skipið og réttlætti Ísraelsstjórn dauðsföll með því að halda því fram að farþegar hefðu veist að sérsveitarmönnunum með hnífum, en aðgerðarsinnar bentu á að báturinn hefði verið á alþjóðlegu hafsvæði og Ísraelar í órétti til að byrja með. Ennfremur að ísraelski herinn hafi átt upptökin að átökunum sem brutust út á Mavi Marmaris.

Munu sigla hvað sem á dynur
Eitt skipið í þeirri skipalest sem nú um ræðir hefur orðið fyrir skemmdarverkum á meðan það lá í grískri höfn sem gerir það sennilega að verkum að það skip kemst ekki með  í þetta skiptið. Einnig hafa grísk stjórnvöld neitað að gefa út siglingaleyfi fyrir tvö skipanna, annað vegna skulda fyrri eiganda, en hitt vegna bilanna. Aðgerðarsinnar hafa þurft að greiða 10.000 evrur til að ganga í lagfæringar á því síðarnefnda. Steinar hafa verið lagðir í götu verkefnisins í Kanada, Grikklandi og Bandaríkjunum, en fáir hafa gengið jafnlangt og hin svokallaða sósíalistastjórn Spánar þar sem þátttakendur í skipalestinni hafa verið handteknir og haldið í einhvern tíma af lögreglunni og hald lagt á ýmis gögn þeirra. Þátttakendurnir eru hvaðan æva að úr heiminum, eins og í fyrra, en nú eru með í för tíu þingmenn Evrópuþingsins og tíu aðrir þingmenn frá Frakklandi, Noregi, Svíþjóð og Spáni ásamt fjölmörgum öðrum farþegum.

Skipalestin áætlar að sigla úr höfn einhvern tíma á næstu dögum og munu Róstur fylgjast með málinu áfram.